Baldur Kol­beins­son, fangi á Litla Hrauni, er sagður hafa gengið berserksgang á sam­eigin­legum gangi vist­manna fangelsins í vikunni. Fréttablaðið greinir frá þessu. Baldur á að baki langan sakaferil en þetta er ekki fyrsta skiptið sem hann er óstýrlátur um jólin.

Samkvæmt Fréttablaðinu var föngum brugðið á fimmtudaginn þegar Baldur trylltist á Litla-Hrauni. Hann er sagður hafa brotið meðal annars sjón­varp, ís­skáp og sófa og eld­hús­á­höld. Fangaverðir þurftu að yfirbuga hann en Páll Winkel fangelsis­mála­stjóri vildi ekki tjá sig um málið.

Baldur hefur ítrekað verið dæmdur fyrir ýmiss afbrot en mörg þeirra áttu sér stað á Litla-Hrauni. Árið 2017 kom til átaka á milli hans og annars fanga sem endaði með því að Baldur beit af efri vör fangans. Þar áður réðst hann gegn fanga og makaði saur í munn hans. Í fyrra barði hann svo 18 ára gamlan hælisleitanda frá Marokkó. Baldur hefur meira og minna setið í fangelsi frá sautján ára aldri.

DV greindi frá því fyrr á þessu ári að um síðustu jól gekk Baldur laus og framdi fjölmörg afbrot. Þá var Baldur sakaður um fimm þjófnaðarbrot en alvarlegast hlýtur að teljast þjófnaður hans á jólagjöfum 23. desember síðustu jól. Samkvæmt ákæru hnuplaði hann jólagjöfum og myndlykli af áfangaheimili Samhjálpar á Þorláksmessu í fyrra og voru áætluð verðmæti um 250 þúsund krónur.