Óveðrið í kvöld hefur víðast hvar náð hámarki og fer frá og með næstu klukkustundum að ganga niður. Það gengur hins vegar mjög hægt niður og snemma í fyrramálið verður ennþá óveður víða á norðvestur- og norðausturlandi. Þar verður til dæmis mestur vindstyrkur 24 metrar á sekúndu og meðfram einhver snjókoma klukkan sex í fyrramálið.

Skólahaldi hefur enda verið aflýst á Akureyri á morgun og víðar norðanlands.

Klukkan sex í fyrramálið verður bálhvasst í Vestmannaeyjum, 24 metrar á sekúndu. Þá verða hins vegar 16 metrar á sekúndu í Reykjavík, að hánorðan. Verulega hvasst og mikil vindkæling en ekki óveður.

Veðrið gengur síðan hægt niður og laust eftir hádegi á morgun verður vindhraðinn kominn niður í 12 metra á sekúndu í Reykjavík og 16 metra víða á Norðurlandi.

Hafa skal í huga að eftir að veðrið gengur niður kólnar mjög mikið og frosthörkur verða á landinu frá með föstudeginum. Það ríkir því sannkallað vetrarríki núna þar sem frosthörkur leysa storminn af hólmi.

Sjá nánar um veðrið á veðurvef DV.