ARA – Restaurant & Bar heitir vinalegur veitingastaður að Búðakór 1 í Kópavogi. Hann er þekktastur sem pizzustaður en er einnig sportbar og grillstaður. ARA er vinsæll af íbúum hverfisins og því var þeim illilega brugðið við aðkomuna á þriðjudag en nóttina á undan brutu einhverjar aðilar allar rúður á staðnum. Fyrir rúmum mánuði var kastað tveimur stórum steinum inn um rúðu á staðnum en  það voru mun minni skemmdir.

„Auðvitað hugsar maður með sér að þessi tvö skipti gætu verið tengd en við erum ekki að velta okkur mikið upp úr því þar sem við höfum stuðning íbúa hverfisins,“ segir Rina Alma, dóttir eigandans Gani Zogaj, í viðtali við DV. Fjölskyldan er frá Kosovo og sú spurning vaknar hvort útlendingaandúð geti legið að baki skemmdarverkunum.

„Það er til alls konar fólk og það er ómögulegt að geta sér til um hvað er að gerast í kollinum á þeim sem gera svona,“ segir Rina.

Fjölskyldan lét skemmdarverkin ekki á sig fá, kom öllu í samt lag og staðurinn var opnaður á þriðjudaginn. Síðan hefur verið mjög mikið að gera og virðist sem nágrannar vilji sýna stuðning sinn í verki. Rina náði mynd af aðkomunni eftir skemmdarverkin og er hún hér með fréttinni.

Þær upplýsingar liggja fyrir að gerendurnir eru menn á þrítugsaldri og leitar lögreglan þeirra. „Þeir notuðu einhvers konar járnkylfur,“ segir Rina og ljóst er að mikil heift eða áköf skemmdarfýsn hefur legið að baki ódæðinu.

„Það sem skiptir okkur mestu máli er að reka þægilegan stað fyrir okkar yndislegu viðskiptavini,“  segir Rina og ljóst er að engin breyting verður á því.