Erna Ýr Öldudóttir, sem er einna þekktust fyrir að afneita loftslagshlýnun, hjólar í Þórð Snæ Júlíusson, ritstjóra Kjarnans, á Facebook. Ástæðan er skrif Þórðar á Twitter um ritstjórnarpistla Viðskiptablaðsins, Óðinn.

Þórður gagnrýnir Óðinn harðlega og skrifar: „Óðinn í VB er með því ömurlegasta efni sem boðið er upp á í íslenskum fjölmiðlum. Hópur frekar mannfjandsamlegra, en peningaelskandi, lítilla kalla sem skrifa nafnlaust níð og sérhagsmunavarnir vikulega. Nýjasta útgáfan stendur verulega undir nafni.“ Þórður Snær vísar svo í pistil Óðins þar sem fréttaflutningur af Samherjamálinu er gagnrýndur.

Líkt og fyrr segir þá er Ernu Ýr misboðið yfir skrifum Þórðar. „Ritstjóri Kjarnans, fullur af heilagri siðvendni og sjálfréttlætingu, tekur æðiskast á Twitter út af málefnalegri yfirferð Óðins í Viðskiptablaðinu um Kveiks-umfjöllun um Samherja, og málum þar sem áður hefur verið hrapað að ályktunum í fjölmiðlum og annarsstaðar – en ekki hefur staðið steinn yfir steini þegar í dómsal var komið, eða til Mannréttindadómstólsins,“ skrifar Erna Ýr.

Hún gerir svo að umtalsefni að hann sé ritstjóri en ekki almennur borgari. „Ætli honum finnist að RÚV hafi nú stöðu óskeikuls dómsstóls, þar sem menn eru rannsakaðir, ákærðir og sekir fundnir? Reynslan fram að þessu hefur ekki verið góð, þegar það hefur verið gert. Athugið að þetta er reyndur RITSTJÓRI fjölmiðils – en ekki blindfullur virkur í athugasemdum úti í bæ (vona ég),“ skrifar Erna Ýr.