Breiðablik og Fram hafa komist að samkomulagi um vistaskipti framherjans knáa Þóris Guðjónssonar yfir til Fram. Þórir sem kom til Breiðabliks í fyrra frá Fjölni lék 16 leiki með Blikaliðinu og skoraði í þeim fjögur mörk.

Þórir á að baki yfir 150 leiki með meistaraflokki og hefur skorað í þeim 44 mörk. ,,Blikar þakka Þóri fyrir góða viðkynningu og óska honum velfarnaðar í framtíðinni,“ segir á heimasvæði Blika.

Ágúst Gylfason fékk Þórir til Breiðabliks fyrir ári síðan en hann var í litlu hlutverki í Kópavoginum í sumar.

Ágúst var svo rekinn úr starfi í haust og Óskar Hrafn Þorvaldsson hefur ekki talið sig hafa not fyrir framherjann, stóra og stæðilega. Hann er annar leikmaður Blika sem fer í 1. deildar lið Fram en áður fór Ólafur Íshólm, markvörður til félagsins.