Mál sem tengist hvarfi Friðriks Kristjánssonar í Paragvæ árið 2013 er nú fyrir Hæstarétti. Blaðamaðurinn Atli Már Gylfason hefur áfrýjað meiðyrðamáli Guðmundar Spartarkusar en Atli Már hafði ýjað að því í fréttum á Stundinni að Guðmundur væri viðriðinn hvarf Friðriks. Guðmundur stefndi Atla Má vegna skrifanna og var Atli Már sýknaður í héraði. Guðmundur áfrýjaði málinu til Landsréttar og þar var Atli Már fundinn sekur og dæmdur til að greiða Guðmundi 1,2 milljónir í miskabætur. Atli Már áfrýjaði til Hæstaréttar og aðalmeðferð málsins var þar í dag. Vænta má niðurstöðu innan tíu daga.

Bróðir hins horfna, Kristján Einar Kristjánsson, hefur nú stigið fram og tjáð sig um málið. Segir hann að fjölskylda Friðriks hafi árangurslaust leitað svara við knýjandi spurningum um hvarf hans hjá Guðmundi Spartakusi. Kristján er jafnframt þakklátur fjölmiðlum fyrir umfjöllun þeirra um málið. Færsla Krisjáns um málið er eftirfarandi:

Ég ákvað eftir að hafa setið, og hlustað á í 4 skipti þessu máli hringlað í réttarsal, þar sem lítið var gert úr fjölskyldu okkar og talað um að við hefðum í raun aðstoðað blaðamenn í þeim tilgangi að selja blöð (já, ég er ekki að grínast), að smá bútur af okkar hlið yrði að koma fram.

Það er óhugsandi, að fyrstu samskipti aðila sem er grunaður um að tengjast hvarfi bróður míns hafi komið í formi stefnubréfs til fjölmiðla, þegar fjölskyldumeðlimir og lögregla höfðu ítrekað reynt að hafa samband við viðkomandi aðila til þess eins og að spurja spurninga, spurninga sem hefðu getað varpað bæði ljósi á sakleysi hans ef svo er og þá aðstoðað fjölskyldu í sárum í leit að Frikka okkar.