Hrafn Jónsson kvikmyndagerðarmaður var meðal vinsælustu pistlahöfunda Íslands en í seinni tíð hefur pistlum frá honum fækkað talsvert. Á Facebook birtir hann þó öðru hvoru pistil en í dag tekur hann fyrir velgengni Miðflokksins í skoðanakönnunum. Af pistli hans að dæma þá er Sjálfstæðisflokkurinn í vanda.

Hann segir að Miðflokkurinn sé að verða hinn nýi Sjálfstæðisflokkur. „Það er bara eins og fúnaða véfréttin úr Hádegismóum hafði spáð fyrir um: Miðflokkurinn er nýi Sjálfstæðisflokkurinn. Hann er búinn að sjúga til sín allt popúlíska lausafylgið – alla hversdagsrasistana, loftslagsafneitunarsinnana og furðulegasta hópinn sem hræðist ekkert meira en einhverskonar yfirtöku „menntaelítunnar“ á samfélaginu,“ segir Hrafn.

Hann segir það kaldhæðnislegt að Sigmundur Davíð biðji um reynslusögur af „bákninu“. „Nú er Sigmundur Davíð líka orðinn yfirlýstur andstæðingur „báknsins“, þessa yfirþyrmandi opinbera yfirvalds sem heldur okkur öllum í heljargreipum sínum – sem er auðvitað smá fyndið komandi frá manni sem skapaði 72 milljarða króna ríkisútgjaldapakka í Leiðréttingunni sem fór að mestu í vasa fólks sem þurfti ekki á peningunum að halda. Manninum sem kostaði skattgreiðendur yfir 40 milljónir fyrr á árinu með fullkomlega tilgangslausu málþófi,“ segir Hrafn.

Hann segir að lokum að þetta setji Sjálfstæðisflokkinn í vanda, því áherslur Miðflokksins virki. „En fólk elskar þetta, dýrkar þetta. Mmmm, gefðu mér aðra skeið af kjaftæði Sigmundur, ljúgðu beint upp í munninn á mér. Það verður gaman að sjá hvaða léttrasíska, yfirborðskennda mökunardans Sjálfstæðisflokkurinn þarf núna að dansa til að lokka þetta fólk aftur heim.“