Erlendur maður sem búsettur er hérlendis var í gær sakfelldur í Héraðsdómi Reykjavíkur fyrir að hafa slegið mann með bjórglasi í höfuðið fyrir utan skemmtistaðinn Tívolí í Hafnarstræti þann 12. febrúar 2017. Maðurinn sem varð fyrir árásinni hlaut 2,5 cm skurð hægra megin á höfði.
Maðurinn játaði brot sitt skýlaust. Var hann dæmdur í fjögurra mánaða skilorðsbundið fangelsi og til að greiða þolandanum miskabætur að fjárhæð 450.000 krónur. Auk þess var hann dæmdur til að greiða málskostnað og málsvarnarlaun til verjanda síns.