Gunnar Nelson, Haraldur Dean faðir hans og Jón Viðar Arnþórsson formaður Mjölnis munu hittast núna í hádeginu og ræða það hvort að augnpot Santiago Ponzinibbio í bardaganum á sunnudagskvöld verði kært til UFC, sambands blandaðra bardagalista. Þetta staðfestir Jón Viðar í samtali við DV.

Gunnar Nelson tapaði bardaganum eftir rothögg í fyrstu lotu en eins og glöggt má sjá á myndböndum potar Ponzinibbio í auga Gunnars þrisvar sinnum.

Aðspurður segir Jón Viðar að Gunnar og hans fólk ætli „ekki að hafa lágt um þetta.“ Mjölnismenn hafa verið iðnir við að pósta myndum og myndskeiðum af augnpoti Argentínumannsins á Facebook síðu sinni. Þá hefur félagið skorað á UFC að láta endurtaka bardagann.

Jón Viðar sagði á Facebook-síðu sinni í gær:

„Potar 3 svar í augað á Gunna. Þetta er hrikalegt! REMATCH!“

DV náði tali af Jóni Viðari sem í hádeginu fundar með þeim feðgum, Gunnari og Haraldi. Segir Jón Viðar að þar verði farið yfir næstu skref en líklegt er að þeir kæri bardagann enda ljóst að Argentínumaðurinn beitti bolabrögðum til að sigra Gunnar Nelson.

„Við ætlum ekki að hafa lágt um þetta. Þetta var óheiðarlegt og á ekki að sjást í þessari íþrótt.“

Hér fyrir neðan má sjá myndskeið þar sem búið er að taka saman hvernig Argentínumaðurinn svindlar.