Samkvæmt dagbók lögreglunnar á höfuðborgarsvæðinu taldist nóttin fremur róleg . Engu að síður var nokkur fjöldi mála bókaður eða um 46 mál frá 23:00-09:30.
Helst var lögregla með afskipti af bíljstórum sem grunaðir eru um akstur undir áhrifum áfengis eða fíkniefna.
Um hálf þrjú í nótt ók lögregla konu á bráðamóttöku sem hafði fallið innanhúss og kenndi sér meins í mjöðm.
Frá Breiðholti barst tilkynning um barn á leikvelli, en lögregla fann engan þegar hún mætti á vettvang.
Einnig var tilkynnt um tónlistarhávaða í Breiðholti um hálf fimm í nótt. Umráðamaður íbúðar lofaði að lækka. Um hálf sjö var samskonar útkall við Miklubraut en þar varð lögregla þó ekki vör við neinn hávaða á vettvangi.
Stúlka slasaðist á ökla í miðbænum og lögregla kölluð út vegna slagsmála á veitingahúsi í Hafnarfirði. Þolandi var með minniháttar meiðsl en gerandi var farinn þegar lögreglu bar að garði. Maður var handtekinn fyrir skemmdaverk, en reyndist í annarlegu ástandi svo hann gistir í fangageymslu þar til unnt verður að yfirheyra hann.
