Íslenskur fjallaleiðsögumaður, Michael Reid, og ísraelskur félagi hans, Yonatan Belik, hyggjast slá heimsmet með því að keyra þvert yfir Bandaríkin og til baka á 80 dögum. Fararskjóti þeirra félaga er 50cc Honda vespa.

Bandaríski fréttamiðillinn Durango Herald ræddi við þá félaga nú á dögunum, en þá voru þeir staddir í Mesa Verde-þjóðgarðinum í Colorado-ríki.

Hinn 3. nóvember síðastliðinn höfðu félagarnir keyrt rúmlega 10 þúsund kílómetra á 50 dögum. Keyrðu þeir þvert yfir norðurhluta Bandaríkjanna og tóku síðan U-beygju í San Francisco og héldu þaðan yfir til suðurríkjanna. Markmiðið er að keyra alls níu þúsund mílur, rúmlega 14.500 kílómetra á 80 dögum, í gegnum 48 ríki Bandaríkjanna, og slá þannig heimsmet í lengstu ferð sem farin hefur verið á 50cc vespu.

Þurfti að endurforrita hugann

Á ferðalaginu hafa þeir verið að taka viðtöl og mynda fólkið sem verður á vegi þeirra, í von um að ýta undir samkennd og skilning á milli fólks, sem er ekki síst nauðsynlegt nú á tímum, þar sem hraðinn er mikill og samskipti fólks eftir því. Hafa þeir meðal annars hitt listafólk, iðnaðarmenn, fjölskyldur, heimilislausa auk ótal annarra sem hafa deilt með þeim sögum úr hverdagslífinu, draumum og vonum.

„Markmiðið er að deila sögum fólks, til að mynda á samfélagsmiðlum, og gefa fólki tækifæri á að kynnast samlöndum sínum,“ segir Michael og bætir við að innihaldsrík samtöl við ókunnuga geti hjálpað fólki að sjá í gegnum hinar ýmsu staðalímyndir sem til eru í samfélaginu.

„Við ættum öll að venja okkur á að tengjast fólkinu í kringum okkur á jákvæðan hátt,“ segir hann jafnframt en hann kveðst hafa alist upp við þann hugsunarhátt að hann ætti að vara sig á ókunnugum, þeir gætu verið vafasamir. „Ég hef þurft að endurforrita hugann, og við viljum koma þessum skilaboðum áfram.“

Þá segjast þeir yfirleitt hafa fengið bestu viðtökurnar frá fólki á þeim svæðum sem teljast fátæk. Þannig hafa bláókunnugir boðið þeim gistingu, mat og fatnað.

Fram kemur að vinirnir hafi lagt upp í ferðina með afar takmarkað ráðstöfunarfé. Þeir hafa sparað pening með því að gista í tjaldi, meira að segja þegar þeir heimsóttu Klettafjöllin frægu (Rocky Mountains) í snjókomu og nístingsfrosti.

Í lok ferðarinnar hyggjast þeir  setja upp sýningu í Washington-borg með ljósmyndum og viðtölum sem þeir hafa sankað að sér undanfarnar vikur. En þeir láta ekki staðar numið þar, en næst hyggjast þeir reyna að slá heimsmet með því að hjóla  rúmlega 1.000 kílómetra á einhjólum yfir Ísrael, og rétt eins og fyrr, hitta og skrásetja kynni sín af heimamönnum.