Það er ekki beint eðlilegt að þurfa að skrifa undir samning um þagnarskyldu fyrir steggjapartý. En það þurfti einn maður að gera fyrir steggjapartý vinar síns. Hann greinir frá þessu í færslu á Reddit.

Maðurinn þurfti að skrifa undir samning sem sagði til um að hann mætti ekki tala um atburði kvöldsins við neinn sem var ekki viðstaddur.

Nú er hann ráðþrota og veit ekki hvort hann ætti að segja brúðinni frá því sem gerðist þetta umrædda kvöld, áður en þau ganga í það heilaga.

Hann segir frá því hvernig þeir vinirnir voru  búnir að drekka allan daginn og fóru aftur á hótelsvítuna. Þar mættu nokkrir stripparar og ekki leið á löngu þar til nokkrir af hópnum voru byrjaðir að stunda kynlíf með þeim.

„Ég er í hamingjusömu sambandi þannig að ég og vinur minn ákváðum að fara aftur niður og spila rúlettu. Þegar við komum aftur upp í herbergið þá sáum við brúðgumann halda fram hjá framtíðareiginkonu sinni.

Ég sagði kærustu minni frá þessu því mér leið svo illa fyrir hönd brúðarinnar. Hún er feimin og yndisleg stelpa sem elskar unnusta sinn mikið.

Hún er líka vinkona kærustu minnar, sem vill að ég segi henni frá þessu. Þau eiga að gifta sig um helgina og ég veit ekki einu sinni hvort þau geta hætt við án þess að þurfa að borga mikil afpöntunargjöld. Ég er frekar hræddur við viðbrögðin þar sem ég skrifaði undir samninginn og kærasta mín skilur það, en hún sagði okkur ekki geta leyft greyið stúlkunni að giftast honum án þess að vita sannleikann.“

Fjöldi fólks skrifaði við færsluna og voru flestir sammála um að konan ætti skilið að vita að unnusti hennar var henni ótrúr.

„Ónýtt brúðkaup er skárra heldur en ónýtt líf eftir einhver ár. Hún ætti að fá að vita allan sannleikann áður en hún giftist honum,“ skrifaði einn netverji.