Ríkisskattstjóri rannsakar nú sérstaklega skattaframtöl áhrifavalda fyrir árið 2018. Þetta kemur fram í umfjöllun Viðskiptablaðsins. Samkvæmt greininni virðist helst vanta upp á að áhrifavaldar telji fram aðrar tekjur frá fyrirtækjum en peningagreiðslur, þ.e. ókeypis vörur og þjónustu sem þeir fá fyrir umfjöllun.
Viðskiptablaðið hefur heimildir fyrir því að hæstu greiðslur til áhrifavalda fyrir hvert samstarf séu eitthvað yfir 100 000 krónur. Lægstu greiðslur séu um 15.000 en algengar greiðslur séu um 50.000. Áhrifavaldar geri grein fyrir þessum tekjum sem verktakagreiðslum í skattframtali. Hins vegar virðist skorta á að áhrifavaldar telji fram greiðslur frá fyrirtækjum sem eru í formi vara og þjónustu, til dæmis utanlandsferða, húsmuna, afnota af bílum og afsláttarkjara. – Segir Ríkisskattstjóri að þegar fyrirtæki afhendi áhrifavöldum svona gæði hljóti það að vera gert með væntingar um umfjöllun þeirra í staðinn.
Algengar uppgefnar mánaðartekjur áhrifavalda samkvæmt tekjublöðum á síðasta ári voru um 300.000 krónur, þær fóru alveg niður í 93.000 kr. hjá þeim tekjulægstu og yfir milljón hjá þeim tekjuhæstu.
Áhrifavaldar hafa einnig verið undir eftirliti vegna ásakana um að sumir þeirra birti færslur sem eru duldar auglýsingar, þ.e. geti þess ekki að greitt hafi verið fyrir umfjöllunina.
