Kristján Þór Júlíusson, sjávarútvegs- og landbúnaðarráðherra, boðaði í síðustu viku til fundar með fulltrúum Hafrannsóknastofnunar og Landssambands veiðifélaga. Tilefni fundarins var að fara yfir stöðu villtu laxastofnana en fyrir liggur að laxagöngur voru litlar sl. sumar auk þess sem lítið vatn hefur verið í ánum og aðstæður fyrir uppgöngu laxa og veiði þannig með versta móti. Fréttatíminn greindi fyrst frá málinu.

Á fundinum fjölluðu fulltrúar Hafrannsóknastofnunar um villtu laxastofnana. Fram kom að búast má við að hrygningarstofnar laxa nú í haust verði almennt litlir. Nokkrir seiðaárgangar eru í uppvexti í ánum á hverjum tíma og hafa mælst þokkalega stórir árgangar í uppvexti í flestum ám frá hrygningu síðustu ára. Þá tóku við umræður en samstaða var um að fylgjast grannt með þróun stofnana og boða fljótlega til annars fundar.

Staðan er alls ekki góð eftir þetta sumar þar sem veiddust um 20 þúsund færri laxar en fyrir ári síðan. Auðvitað verður að gera eitthvað og þessi fundur sýnir allavega vilja. Hvað sem það verður en orð eru til alls fyrst.