Fréttablaðið skýrir frá þessu í dag. Fram kemur að í svörum frá Embætti ríkislögmanns komi fram að embættið hafi greitt þetta eftir samþykki forsætisráðuneytisins.
Í kjölfar sýknudóms Hæstaréttar í málunum lá fyrir að viðræður um bætur til hinna sýknuðu væru framundan. Einar Karl Hallvarðsson, ríkislögmaður, tilkynnti um vanhæfi sitt því hann er sonur Hallvarðs Einvarðssonar sem kom að meðferð málanna á áttunda áratugnum sem vararíkissaksóknari. Forsætisráðherra setti því Andra Árnason sem ríkislögmann í málunum og hefur hann verið á hliðarlínunni í sáttaumleitunum við dómþola en nefnd, sem forsætisráðherra skipaði, hefur séð um þær.
Í stefnu Guðjóns Skarphéðinssonar vegna málsins kemur fram að lögmaður hans hafi átt tvö símtöl við settan ríkislögmann og einn fund með honum. Lögmaðurinn hefur sent settum ríkislögmanni tvö bréf þar sem hann skoraði annars vegar á hann að taka skriflega afstöðu til kröfu Guðjóns og hins vegar með ábendingu um að ríkið geti sparað ef það greiðir inn á kröfuna. Hafi settur ríkislögmaður ekki svarað þessu efnislega og heldur ekki öðrum bréfum.
