Maður hefur verið dæmdur í 15 daga skilorðsbundið fangelsi og til greiðslu skaðabóta og málskostnaðar vegna líkamsárásar á konu á Hótel Borealis, í Grímsnesi, í apríl á þessu ári. Maðurinn reif í handlegg konunnar svo hún hlaut mar á upphandlegg og úlnlið. Auk þess hlaut konan eymsli í annarri öxlinni. Dómurinn var kveðinn upp í Héraðsdómi Suðurlands.

Konan varð vitni að  átökum mannsins og konu hans og kvaðst hún hafa reynt að ganga í milli. Maðurinn segir hins vegar að konan hafi ráðist á sig og því hafi hann brugðist við í sjálfsvörn. Dómurinn taldi ekki sannað hvort þeirra hefði átt upptökin að átökunum. Var það virt honum til refsilækkunar að ekki taldist sannað að hann hefði átt upptökin.

Maðurinn var með ógnandi tilburði á hótelinu og þorði starfsfólk ekki að grípa inn í. Lögreglu barst tilkynning um framferði hans, kom á vettvang og handtók hann. Var hann talinn vera í annarlegu ástandi. Hann var handtekinn og færður á lögreglustöðina á Selfossi.

Auk hins skilorðsbundna fangelsisdóms var maðurinn dæmdur til að greiða konunni 75.000 krónur og málvarnarlaun hennar, rúmlega 230.000. Þá þarf hann að greiða allan sakarkostnað, 637.000, þar af verjanda sínum rúma hálfa milljón.