Freyja Haraldsdóttir segist hafa setið undir hatri í mörg ár vegna löngunar hennar til að verða fósturmóðir. Nú ákveður hún að birta athugasemdir tveggja Íslendinga sem hafa gagnrýnt það á samfélagsmiðlum. Hér fyrir neðan má sjá athugsemdirnar sem Freyja telur vera frá tröllum.

„Í mörg ár hef ég setið undir hatri frá fólki fyrir það að telja mig eiga rétt á eðlilegri málsmeðferð og reyndar telja mig verða hæfa fósturmóður. Ég held það sé orðið tímabært að skila eitthvað af þeirri skömm með því að draga þetta mæta fólk fram í dagsljósið og velta því dálítið fyrir sér. Dreifa því jafnvel – og láta það taka ábyrgð á orðum sínum. Ég kynni því til leiks þau Magnús Árnason og Bryndísi Símonardóttur. Magnúsi finnst ég fáránleg og það að ég elski og annist börn óeftirsóknarvert fyrir þau öll sem eitt. Hver vill svosem vera elskaður af fatlaðri konu? Bryndís tekur afstöðu með börnum og segir nei. Hún telur mig skaðlega og aðstoðarkonur mínar ógn við tengslamyndun og stöðugleika við börn,“ skrifar Freyja.

Hún segir þau tvö tröll. „Það þýðir ekki að segja að ég eigi ekki að taka svona athugasemdum frá tröllum nærri mér. Krakkar, þessi viðhorf, eru viðhorf Barnaverndarstofu. Þetta eru einmitt málsástæður þeirra. Að sitja undir réttarhöldum um líkama sinn og líf er ekki auðvelt. En það er kökusneið miðað við það að búa í samfélagi sem er morandi í athugasemdum sem þessum um líkama þinn og líf. Megi þau eiga sitt hatur og taka ábyrgð á því. Orðstír og heiður þeirra er ekki mín ábyrgð.“

https://www.facebook.com/freyja.haraldsdottir.3/posts/2422350891340926