Óhætt er að segja að innlegg Sæmunds Trygve Nordquist í Facebook-hópinn Málfrelsið hafi vakið hörð viðbrögð. Í stuttu máli má lýsa því sem jarmi eða svokölluðu meme þar sem Gréta Thunberg er klámgerð, en hún er líkt og flestir vita barn. Með öðrum orðum þá reyndi Sæmdundur að gera grín að barnaníði í samhengi við Grétu. Færslan stóð óhreyfð í nokkurn tíma og var fordæmd af mörgum í þessum annars grófa hóp.
Yfirlýst markmið hópsins er að leyfa svo gott sem alla tjáningu, líkt og nafnið gefur til kynna. Þessi færsla þótti þó óverjandi og útskýrði einn stjórnenda hópsins, Brynjólfur Sveinn Ívarsson, það nánar í færslu: „Þar sem notandi dreifði klúru meme’i með Grétu Thunberg var ákveðið að fjarlægja póstinn. Þetta hefur því miður orðið til þess að við teljum okkur nauðbeygða til þess að breyta ritstjórnarstefnunni. 1. Það er óheimilt að pósta klámi og klúru efni sem vísar til barna og það verður umsvifalaust fjarlægt. 2. Klám miðast við hefðbundnu lagalegu skilgreininguna og orðalagið klúrt vísar til þess að það ýji í það minnsta að kynferðislegu efni, m.ö.o. er það rýmra hugtak en erótík. 3. Brot á þessum reglum varðar tímabundinni eða ótímabundinni brottvísun úr grúppunni eða áminningu ef sérstaklega stendur á.“
Sæmundur sjálfur skrifar athugasemd við færslu Brynjólfs og segir: „Fólk er orðið svo viðkvæmt og móðgunnargjarnt nú til dags en svona hefur nú fólk misjafnlega saurugan hugsunnarhátt hehehe.“ Aðrir meðlimir hópsins kvarta undan þessari ritskoðun. Einn maður telur það til að mynda óhjákvæmilegt að Gréta Thunberg verði klámgerð þar sem hún tali um pólitík. „Kannski ekki nota börn í politískum tilgangi? Óhjákvæmilega endar þetta svona!,“ skrifar sá maður.
Kona nokkur telur þetta endalok málfrelsis innan hópsins. „Jæja svo málfrelsið tók enda og ritskoðun tekin við,“ skrifar hún en önnur kona svarar og segir: „Æ já en ömurlegt að fá ekki að pósta myndum sem kyngera börn.“ Fyrri konan svarar og segir elítuna stunda barnaníð á Grétu: „Ég hef séð ótal innlegg hér sem hafa fjallað um þessa stúlku þar sem fjármála öflin og pólitíkusar hafa stundað að mínu mati barna níð á þessu barni í pólitískum tilgangi og ekki var það tekið út, hvers vegna ekki? Er barnaníð ekki sama og barnaníð?“
Gylfi nokkur skrifar athugasemd og virðist vera með nokkuð þversagnakenndar skoðanir á gríni um barnaníð: „Ég er reyndar alveg sekur um það að hafa húmór og hafa fundist þessi póstur hans fyndinn, átti kannski betur heima hjá fyndnum frændum. En líka sem faðir, barnaníð er ekkert fyndið. Hér á landi fá barnaníðingar uppreisn æru og allt of væga dóma. Að mínu mati ætti að farga þeim sem gerast sekir um slík brot. Ættum kannski að taka þá umræðu frekar en að eini miðill landsins sem má segja skoðun sína breytist svo í ritskoðun. Fyrir mig ætti póstur hans fá að birtast hér. Því að þá get ég þó svarað honum og sagt mína skoðun,ef ekki hér, hvar þá? Þá er málfrelsið farið og ritskoðun kominn í stað frelsis. Það að minn húmor og skoðun móðgi þig er einmitt ástæða málfrelsins,“ skrifar hann.
Aktívistinn Ugla Stefanía Kristjönudóttir Jónsdóttir segir einfaldlega eitthvað að hjá fólki sem gerir þetta. „Jesús hvað það er mikill viðbjóður að dreifa kynferðislegu efni af barni (eða sem ýjar augljóslega að því) og telja það vera sitt málfrelsi. Það er eitthvað alvarlegt að ef svo er um búið hjá fólki. Bara í alvöru talað.“
