Miklu magni af áfengi var stolið úr bílskúr á Suðurnesjum um helgina. Sá eða þeir sem þar voru á ferð höfðu á brott með sér slatta af bjór, hvítvíni, rauðvíni og gini. Bílskúrinn var ólæstur og ekki er vitað hverjir voru þarna að verki.
Þetta kemur fram í tilkynningu frá lögreglunni á Suðurnesjum. Þar segir enn fremur:
„Þá var lögregla kvödd að gistiheimili í umdæminu þar sem grunur lék á að tveir gestir í einu herbergjanna væru með fíkniefni. Sú reyndist vera raunin því á náttborðum í herberginu voru bæði meint kannabisefni og kókaín. Annar gestanna játaði eign sína á efnunum.“
