Þau mistök urðu hjá KSÍ í gær að verðlaunaafhending eftir úrslitaleik kvenna í 3. flokki á Íslandsmótinu í knattspyrnu gleymdist. Enginn bikar og engin verðlaun voru afhent. „Pétur Pétursson, þjálfari meistaraflokks kvenna hjá Val, átti að afhenda verðlaunin og við stóðum bara þarna eins og illa gerðir hlutir. Þetta var mjög miður,“ segir ósátt foreldri eins leikmanna Íslandsmeistara Breiðabliks í 3. flokki við DV.

Viðkomandi aðila þykir þetta vera mikil óvirðing við þá leikmenn sem áttu í hlut. Leikurinn fór fram að Hlíðarenda, heimavelli Vals, og þarna áttust við Valur og Breiðablik. Breiðablik sigraði og varð Íslandsmeistari. Foreldrið lýsir því sem gerðist eftir leikinn svo:

„Þegar leik var lokið söfnuðust stelpurnar saman, eins og venja er, og biðu eftir verðlaunaafhendingu en það var enginn bikar né verðlaunapeningar tilbúnir til afhendingar af hálfu KSÍ. Bæði lið stóðu því í um 10-15 mínútur á vellinum í úrhellis rigningu og roki og biðu þess að bikar yrði afhentur svo hægt væri að fagna tveimur efstu sætum á Íslandsmótinu. Þegar biðin var orðin óþolandi fór aðili Vals inn á Hlíðarenda og náði í gamlan bikar úr einhverjum verðlaunaskápi sem afhentur var sem sigurlaun. Sem sé, enginn bikar, engir verðlaunapeningar, engin formleg afhending af hálfu KSÍ og stelpurnar látnar standa eins og illa gerðir hlutir á vellinum í slagviðrinu að bíða verðlaunanna.“

Foreldrið sendi fyrirspurn vegna málsins á KSÍ og Klara Bjartmarz framkvæmdastjóri svaraði:

„Því miður urðu þau leiðu mistök hjá okkur í gær að það gleymdist að “úthluta” þessari verðlaunaafhendingu, þannig að það fór enginn frá okkur á staðinn.Það uppgvötaðist ekki fyrr en eftir leikinn og það tók tíma að koma bikarnum og medalíunum frá Laugardalsvelli og inn á Hlíðarenda.“

Foreldrið segir hins vegar við DV að upplifun allra á staðnum hafi verið sú að bikarinn og verðlaunin hafi aldrei komið því allir voru horfnir á braut áður en nokkur bikar eða medalía sást á svæðinu. Viðkomandi segir jafnframt:

„Þessi óvirðing KSÍ þykir mér fyrir neðan allar hellur og ólíðandi að ferlar sambandsins skuli ekki vera skýrari en þetta. Þetta er ólíðandi. Hér er um að ræða stelpur sem eru búnar að leggja ótrúlega hart að sér til að ná þessum áfanga sem á að vera stærsta stundin á þeirra stutta fótboltaferli – og svo getur KSÍ ekki einu sinni veitt verðlaun. Mikil skömm fyrir sambandið, finnst mér.“

Klara skrifaði ennfremur í tölvupóstinum til foreldrisins:

„Okkur þykir þetta ákaflega miður, við skipuleggjum fjölmargar verðlaunaafhendingar á hverju ári og fram að þessu var tímabilið búið að ganga áfallalaust.

Við eigum eftir að fara betur yfir þetta og gerum það á morgun, en þar er ljóst að hér voru einfaldlega um að ræða mistök á skrifstofunni.“