Í gær birtust þær fréttir á Vísi að endurstofnað WOW air hefði ekki verið í neinum samskiptum við Dulles-flugvöll í Washington frá því í ágúst síðastliðnum. Christina Saull, talsmaður flugvallarins, segir engin samskipti vera á milli flugvallarins og WOW og að engar flugferðir með félaginu til eða frá flugvellinum hafi verið settar á.
Á kynningarfundi eftir endurstofnun WOW í byrjun september var gefið út að flugferðir félagsins hæfust í október og fyrstu ferðirnar yrðu milli Reykjavíkur og Washington. Þetta var þann 6. september. Þann dag hafði DV samband við þennan sama talsmann Dulles-flugvallar, Christina Saull, sem sagði að einn fundur hefði verið haldinn með eigendum WOW en ekkert hefði verið fastsett um þjónustu flugvallarins við félaginu.
Athygli vekur, að samkvæmt frétt Vísis, hafa engin samskipti átt sér stað milli WOW og flugvallarins síðan frétt DV um þetta var birt fyrir mánuði síðan.
Erfitt er að sjá í ljósi þessara upplýsinga að áætlunarflug með WOW endurfæddu hefjist í þessum mánuði. Eigendurnir hafa þegar keypt flugrekstrarvörur úr þrotabúi WOW og því hljóta allir að reikna með því að starfsemin hefjist á næstunni. Flest bendir hins vegar til að það verði ekki í þessum mánuði.
