Héraðsdómur Reykjavíkur hefur dæmt karlmann til greiðslu sektar vegna fíkniefnabrots á tónlistarhátíðinni Secret Solstice í Laugardalnum árið 2017.

Maðurinn var ákærður fyrir að hafa í vörslu sinni 1,88 grömm af tóbaksblönduðu kannabisefni. Veitti lögregla því athygli hvar maðurinn kastaði frá sér gulum hólki sem innihélt efnin þegar hann varð var við að lögregla nálgaðist.

Þrír lögreglumenn með fíkniefnaleitarhunda voru við eftirlit á hátíðinni.

Manninum var gefinn kostur á að ljúka málinu án dómsmeðferðar með sektargerð, en í dómi segir að ekki hafi reynst unnt að ljúka málinu með þeim hætti og var því þá vísað til dómstóla.

Maðurinn sagði fyrir dómi að þáverandi kærasta hans hefði verið með efnin frá sér. Sjálfur kannaðist hann ekki við það og sagðist ekki neyta kannabisefna.

Lögreglumaður kom fyrir dóm og sagðist hún hafa greinilega séð umræddan mann kasta frá sér hlut. Það hefði reynst vera gleraugnahylki sem innihélt fíkniefni sem lagt var hald á. Annar lögreglumaður sagði enn fremur að fíkniefnaleitarhundir undir hans stjórn hefði merkt á manninn.

Manninum var gert að greiða 58 þúsund krónur í sekt og auk þess voru 1,88 grömm af tóbakslblönduðu kannabisefni gerð upptæk. Þá var manninum gert að greiða allan sakarkostnað, 344 þúsund krónur.