„Ásta Guðrún Helgadóttir, fyrrum þingflokksformaður Pírata, er á leið úr flokknum og yfir í Samfylkinguna. Þetta verður tilkynnt á allra næstu dögum.“

Þannig hljómaði frétt eftir Eirík Jónsson á síðu hans eirikurjonsson.is. Þar sagði enn fremur að Ásta Guðrún hefði ekki verið velkomin á þingflokksfundi Pírata. Segir Eiríkur að henni hafi þannig verið stillt upp við vegg.

Ásta Guðrún birtir yfirlýsingu á Facebook-síðu sinni þar sem hún segir frétt Eiríks vera bull. Orðrétt segir hún:

„Orðrómur um að ég sé gengin í Samfylkinguna er bull. Góðar stundir.“

Líklegt er að myndin sem fylgir frétt Eyjunnar hafi komið þessum orðrómi af stað. Myndin var tekin við þinglok og birti Oddný Sturludóttir samfylkingarkona hana á Facebook. Þar sagði:

„Þingflokkurinn óskar ykkur gleðilegs sumars!“

Þar mátti sjá Ásta Guðrúnu brosandi í hópi samfylkingarfólks.