Ingibjörg Egilsdóttir, fyrrverandi kærasta Hafþórs Júlíusar Björnssonar og fulltrúi Íslands í keppninni Ungfrú heimur árið 2009, segist í stöðufærslu á Facebook aldrei hafa upplifað ofbeldi né ógn af honum. Hún segist hafa séð sig knúna til þess að koma honum til varnar í kjölfar alvarlegra ásakanna í fjölmiðlum, á samfélagsmiðlum og manna á milli í garð hans er varðar meinta ofbeldishneigð hans gagnvart fyrrverandi kærustum og barnsmóður.

„Ég kynnist Hafþóri sem mjúkum og tilfinningaríkum manni. Ég fann það fljótlega að hann var stór karakter með stórt skap og varð því oft fljótur til. Í okkar samskiptum kom þó aldrei nokkurn tímann fyrir að hann hótaði mér né beitti mig líkamlegu ofbeldi. Ég upplifði aldrei að lífi mínu væri ógnað né að Hafþór væri líklegur til að meiða mig á einhvern hátt,“ skrifar Ingibjörg í opinni færslu á Facebook.

Líkt og fram í Fréttablaðinu um helgina hefur Thelma Björk Steimann hönnuður og barnsmóðir Hafþórs sagt hann hafa ítrekað beitt sig ofbeldi á meðan samband þeirra stóð. Hafþór Júlíus hafnar þessum alfarið. „Vinir okkar og ættingjar töluðu hins vegar oft um það að Thelma hefði beitt mig bæði andlegu og líkamlegu ofbeldi,“ sagði Hafþór á dögunum.

Thelma sagðist hafa óttast líf sitt meðan hún var með Hafþóri. „Hann sló mig og henti mér til, henti mér á hluti og braut hluti. Oft tók hann mig hálstaki þannig að ég leið út af. Stundum hélt hann mér niðri eða hélt mér með annarri hendi á meðan hann kýldi mig með hinni,“ sagði Thelma í viðtali við Fréttablaðið.

Ingibjörg segir að hún kannist ekki við lýsingar sem þessar. „Það sem ég hef lesið síðustu vikur hefur komið mér verulega á óvart. Þau orð lýsa á engan hátt þeim Hafþóri sem ég kynntist og þekki. Það er bæði ljótt og ósanngjarnt að dæma áður en sekt er sönnuð. Hvað er það annað en ofbeldi að tjá sig opinbert á neikvæðan og meiðandi hátt um ósakfelldan mann? Er það aðferð sem við viljum kenna börnunum okkar? Ég á afar erfitt með að sjá Hafþór fyrir mér í hlutverki þessa skelfilega ofbeldismanns sem búið er að mála hann upp sem,“ skrifar Ingibjörg.

Morgunblaðið greindi frá því í dag að styrktarsamningar í það minnsta tveggja fyrirtækja við Hafþór Júlíus væru til skoðunar eftir viðtal Fréttablaðsins. Annars vegar sagði Vera Dagsdóttir, markaðsstjóri fiskverslunarinnar Hafsins, slíkan samning vera til skoðunar og hinsvegar kom fram í skriflegu svari frá markaðsdeild veitingastaðarins Gló að það sama væri upp á teningnum hjá því fyrirtæki.