Lögreglan á höfuðborgarsvæðinu leitar ökumanns fólksbifreiðar sem ók á 10 ára dreng á Fífuhvammsvegi í Kópavogi föstudaginn 16. ágúst síðastliðinn klukkan 13.48. Málið var ekki tilkynnt til lögreglu fyrr en síðar, en í skeyti frá lögreglu kemur fram að við áreksturinn hafi drengurinn fallið í götuna, hann staðið upp aftur en farið strax af vettvangi. Því náði ökumaðurinn ekki að hafa tal af honum.

Foreldrar drengsins fóru með hann á slysadeild eftir slysið og þá komu áverkar í ljós. Ökumaður fólksbifreiðarinnar var á vettvangi í nokkrar mínútur og ræddi meðal annars við aðra vegfarendur, en hann og aðrir sem kunna að lenda í slíkum aðstæðum eru minntir á mikilvægi þess að tilkynna um það til lögreglu. Meðfylgjandi er mynd af gatnamótunum þar sem slysið varð, en fólksbifreiðinni var ekið austur Fífuhvammsveg á móts við Smáralind.

Umræddur ökumaður er beðinn um að hafa samband við lögreglu í síma 444 1000, en hafi aðrir upplýsingar um ökumanninn, eða slysið, má koma þeim á framfæri í tölvupósti á netfangið heimir@lrh.is eða í einkaskilaboðum á fésbókarsíðu Lögreglunnar á höfuðborgarsvæðinu.