Fjölmiðlamaðurinn og útgefandinn Björn Ingi Hrafnsson sagði frá því á Facebook í gær að hafa verið útgefandi DV þegar fjallað var um hlutabréfaviðskipti dómara fyrir hrun. Vildi Björn Ingi halda því til haga að það hafi verið DV sem fjallaði fyrst um málið.
„Margir töldu þá að blöðin hefðu ekki átt að segja frá þessu vegna bankaleyndar. Fjölmiðlarnir töldu hins vegar að upplýsingarnar ættu erindi við almenning. Nú hefur Mannréttindadómstóll Evrópu tekið undir það og fyrir vikið geta margir dómar í svonefndum hrunmálum verið ónýtir,“ skrifaði Björn Ingi.
Helgi Seljan, fjölmiðlamaður á RÚV, skrifaði hins vegar athugasemd og sagði þetta alrangt hjá honum. „Það voru reyndar fréttastofa Stöðvar 2 og Kastljósið sem fjölluðu um málið. Þar varst þú blessunarlega hvorki útgefandi né ritstjóri,“ skrifaði Helgi í gær.
Síðar þann sama dag skrifaði Helgi á eigin Facebook-síðu og vísaði til kristinnar trúar Björns Inga: „Þau eru mörg boðorðin. Og vandratað frá einum og upp í tíu. Þess vegna er gott að tileinka sér þau reglulega og oft, áður en maður fer að hlýða öðrum yfir þau; hvað þá byggja um sig bænahús. „Hús mitt á að vera bænahús fyrir allar þjóðir? En þið hafið gert það að ræningjabæli“ segir nafni fyrrum forseta Hæstaréttar. Hér er er fátt rétt með farið nema stafsetningin. Hér er á ferð ógurlega kjánaleg tilraun manns til að reyna eigna eigin þrotabúi, annarra manna verk. Það er ekki kristilegt heldur.En Gvuð fyrirgefur. Og við hin líka.“
Fréttablaðið fjallaði um þessar deilur í blaðinu í morgun og virðist það einungis hafa hleypt illu blóði í erjurnar. Í blaðinu skrifar Ari Brynjólfsson: „Það lá nánast við stafrænum slagsmálum þegar Helgi Seljan á RÚV og Björn Ingi Hrafnsson á Viljanum deildu um hvaða miðill hefði fyrstur sagt frá hlutabréfaviðskiptum dómara. Björn Ingi segir DV hafa verið á undan, en Helgi að það hafi verið Fréttastofa 365 og RÚV. „Þar varst þú blessunarlega hvorki útgefandi né ritstjóri,“ bætti Helgi við. „Það er ekki að spyrja að hrokanum og yfirlætinu frá fulltrúa Ríkisútvarpsins, frekar en fyrri daginn,“ svaraði Björn Ingi. Í ljós kemur að Björn Ingi hefur í raun rétt fyrir sér. Fréttastofa 365 greindi frá Glitniskaupum dómara kvöldið 5. desember. Helgi var fullbráður á sér því DV var fyrsti miðillinn sem sagði frá Landsbankakaupunum síðar í sömu viku. Rólegir, strákar.“
Þessu deilir Björn Ingi og telur málið þar með afgreitt. „Einföld upprifjun hér í gær varð til þess að fréttamaður Ríkisútvarpsins sakaði mig um ósannindi. Sá er frægur fyrir að hampa tilteknum fjölmiðlum og ata aðra auri og skiptir miklu máli hver er með honum í liði og hver ekki. Svo mjög lá honum á að reyna að koma höggi á mig að hann setti púðurskot í byssuna og allt sprakk því framan í hann sjálfan. Fréttablaðið missti ekki af þessu,“ skrifaði Björn Ingi nú síðdegis.
Helgi taldi augljóslega að málinu væri ekki lokið með skrifum Ara í Fréttablaðinu. „DV sagði ekki fyrst frá landsbankabréfakaupunum. Það var vísað í þau í Kastljósinu,“ skrifar Helgi.
Þessu svarar Björn Ingi: „Upplýsingarnar sem DV birti sættu miklum tíðindum og reyndu fjármálastofnanir og fleiri aðilar að koma í veg fyrir birtingu þeirra. Varð stórfrétt í öllum fjölmiðlum sama dag og það birtist. Það var einfaldlega það sem ég rifjaði upp í mjög saklausri færslu í gær. Þú verður algjörlega að eiga það við þig, hvernig þú spilaðir úr málinu, eða sakaðir mig um lygar og hæddist að trú minni. Það er þér til minnkunar, en líklega sérðu það ekki.“
Helgi hafnar því að hann hafi verið að gera grín að trú Björns Inga, hann hafi verið að grín að persónu hans. „Þú varst að reyna að fleyta því að þið hefðuð á einhvern hátt haft eitthvað með það að gera að þessar upplýsingar komu fram fyrst. Það er rangt. Þið fylgdu eftir umfjöllun annarra. Ég er ekki að hæðast að trú þinni. Það myndi ég aldrei gera. Ég er að hæðast að þér. Það hvort ég sé lítill eða stór í þínum augum Björn Ingi er bara ekki relevant, fyrir neinn. Að ég geri greinarmun á fjölmiðlum, hlýtur að vera mér algjörlega frjálst. Ég tala nú ekki um þegar þínir eru í öðrum hópnum,“ segir Helgi.
Björn ákveður á þessu tímapunkti að hætta rifrildinu. „Það er tilgangslaust að þrátta við mann sem tekur engum rökum og hæðist að fólki alla daga. Haltu því bara endilega áfram, sá sem slíkt stundar er á eigin vegferð og gerir það á eigin ábyrgð,“ skrifar Björn Ingi.
Þessu svarar Helgi: „Rólegur Móses“.
