Upptökin á þessum hrakförum Haralds má rekja til viðtals Morgunblaðsins við hann en þar lýsti Haraldur því yfir að það mætti finna spillingu innan lögreglunnar. Mörgum fannst eins og Haraldur væri þannig að hóta því að ef menn vildu koma honum úr embættinu þá gæti hann dregið fleiri niður með sér.
Fjölmiðlamaðurinn Helgi Seljan tjáði sig um málið á Twitter en þar furðaði hann sig á því hvaða almannatengslafulltrúi hefði ráðlagt Haraldi að fara í þetta viðtal
„Það eina sem mig langar að vita núna er hvaða PR-maður ráðlagði Ríkislögreglustjóra að fara í viðtal við Moggann? NB Viðtal sem hann fékk væntanlega að lesa yfir, en láta samt þessi spillingarbrigsl standa? Að klúðra svona viðtali er eitthvað sem krefst einbeitts brotavilja.“
Vísir greindi frá því í gær að það sé ráðgjafarfyrirtækið KOM sem starfar fyrir embætti ríkislögreglustjóra. KOM hefur áður vakið athygli í fjölmiðlum en mikið hefur verið fjallað um tengsl fyrirtækisins við Sjálfstæðisflokkinn.
Þetta vissi Helgi ekki þegar hann furðaði sig á því hver hafi ráðlagt Haraldi. Á Twitter gagnrýnir Helgi KOM harðlega og skrifar:
„Almáttugur! Þetta gat þá versnað! Það er enginn eins sammála því og meðeigandi Friðjóns, að ótækt sé að ríkið sé látið borga fyrir þjónustu sem það síðan fær ekki. Þetta er eins og að borga ÍAV fyrir að glerja Hörpuna en að þeir mæta og rífi þakið af.“
Líkt og Helgi kemur inn á í tísti sínu þá er KOM að mörgu leyti ekki hefðbundin PR-stofa, þar sem allir helstu menn þar innanborðs hafa mikil og djúp tengsl við Sjálfstæðisflokkinn. Stofan hefur á áberandi hátt fengið verkefni frá flokknum eða ríkinu.
Fyrirtækið styrkti Sjálfstæðisflokkinn um tæpar 240 þúsund krónur á árinu 2014 en fyrirtækið gaf flokknum vinnu sína í tengslum við vandræði Hönnu Birnu Kristjánsdóttur. Það var Stundin sem greindi frá þessu fyrir nokkrum árum. Stundin greindi einnig frá því að KOM hafi aðstoðað Geir H. Haarde, fyrrverandi forsætisráðherra, vegna landsdómsmálsins. Auk þess fól menntamálaráðuneytið fyrirtækinu að annast kynningu vegna Hvítbókar Illuga Gunnarssonar, fyrrverandi menntamálaráðherra, en ráðuneytið greiddi rúma milljón fyrir það.
Kjarninn greindi síðan frá því á sínum tíma að Lögreglan á Höfuðborgarsvæðinu hafi greitt fyrirtækinu um 830 þúsund krónur fyrir sérfræðiþjónustu í tengslum við Lekamálið og samantekt Geirs Jóns Þórissonar, fyrrverandi yfirlögregluþjóns.
Friðjón R. Friðjónsson, framkvæmdastjóri og annar eigandi ráðgjafarfyrirtækisins Kom, er einnig áhrifamaður í Sjálfstæðisflokknum. Hann hefur boðið sig fram í prófkjörum hjá flokknum og um tíma gegndi hann starfi aðstoðarmanns Bjarna Benediktssonar. Friðjón er raunar helsti spunameistari flokksins, ef svo má segja, en hans titill innan flokksins er „formaður upplýsinga- og fræðslunefndar Sjálfstæðisflokksins“.
Meðeigandi Friðjón, sem Helgi Seljan vitnar til, er Björgvin Guðmundsson. Hann starfaði sem ritstjóri Viðskiptablaðsins. Á Twitter má sjá að hann fjallar nær eingöngu um málefni tengd hægristefnu eða Sjálfstæðisflokknum.
Einn starfsmaður KOM er Gísli Freyr Valdórsson og er hann titlaður ráðgjafi á heimasíðu félagsins. Gísli Freyr var dæmdur í átta mánaða skilorðsbundið fangelsi fyrir þátt sinn í Lekamálinu en hann var aðstoðarmaður Hönnu Birnu Kristjánsdóttur. Áður en hann að lokum viðurkenndi sök hafði hann ítrekað reynt að koma henni yfir á annað fólk.
