Á fjórða tímanum í nótt sprakk sprengja við taílenskan veitingastað á Amager í Kaupmannahöfn. Mikið eignatjón varð en sem betur fer meiddist enginn. Segja má að Vilborg Ingvaldsdóttir hafi verið í hringiðu atburðanna í nótt því hún býr í húsinu aftan við veitingastaðinn og vaknaði við sprenginguna.

Þetta kom fram í kvöldfréttum Danska ríkisútvarpsins (DR). Þar var rætt við Vilborgu sem svaf svefni hinna réttlátu þegar sprengjan sprakk. Hún vaknaði þegar gler brotnaði.

„Ég hélt að einhver hefði kastað steini inn um rúðuna. Ég sá að allar rúðurnar mínar voru heilar en sá svo að lögreglan var komin og hafði girt allt af.“

Hún áttaði sig þó fyrst á að um sprengingu hafði verið að ræða þegar lögreglan hringdi í hana og bað hana um að yfirgefa húsið vegna hrunhættu.

„Þetta var ekki mikill hávaði, fannst mér. Ég er jú frá Íslandi svo ég er vön jarðskjálftum. Mér var brugðið þegar ég sá húsið.“

Sagði hún einnig og bætti við: „Mér er brugðið.“

Lögreglan hefur unnið að rannsókn málsins í allan dag en enginn hefur verið handtekinn vegna þess. Þetta var tólfta sprengingin á Kaupmannahafnarsvæðinu það sem af er ári en ekki liggur fyrir hvort þessi sprenging tengist öðrum sprengingum.