Hætt hefur verið við stærstu lyfjarannsókn sem ráðist hefur verið í hér á landi en um var að ræða rannsókn á nýju lyfi Amgen og Novartis við Alzheimer. Ástæðan fyrir þessu er sú að þróun á lyfinu hefur verið hætt þar sem bakhjarlar rannsóknarinnar töldu litlar líkur á að lyfið kæmist á markað.

Fjallað er um málið í Læknablaðinu.

Greint var frá rannsókninni á forsíðu Fréttablaðsins þann 14. maí 2018 en þar kom fram að Amgen og Novartis hefðu sameinast um þróun lyfsins eftir að íslensk erfðagreining staðfesti lyfjamörk sem sýndu fram á möguleika þess að hefta eða stöðva ferlið með lyfjagjöf.

Í frétt Læknablaðsins kemur fram að 129 Íslendingar hefðu tekið tilraunalyfið við Alzheimer hér á landi.

Jón Snædal, öldrunarlæknir á Landspítalanum, fór fyrir lyfjarannsókninni hér á landi og rekur hann ástæðuna fyrir því að þróun lyfsins var hætt. „Ástæðan er sú að fyrstu rannsóknir sýndu að þeir sem tóku það virtust muna verr en þeir sem fengu lyfleysu.“ segir Jón og bætir við að þetta hafi sést á minnisprófum sem lögð voru fyrir. „Það var sláandi að þetta skyldi vera niðurstaðan.“

Jón segir að markmiðið með rannsókninni hafi verið að fá svar við því hvort hægt sé að koma í veg fyrir Alzheimer. Þar sem rannsóknin er stöðvuð það snemma fæst ekki svar við þeirri spurningu. „Þá sitjum við eftir með þá hugsun að þetta gæti verið leið sem er fær en ekki er búið að sanna það eða afsanna.“

Hér má lesa umfjöllun Læknablaðsins í heild.