Lögreglan í Suður-Kóreu telur sig hafa fundið manninn sem drap að minnsta kosti þrjá einstaklinga í borginni Hwaseong, suður af Suður-Kóreu, á árunum 1986 til 1991.

Raðmorðingi hélt borginni í heljargreipum á þessum tíma, en alls voru tíu manns myrtir með hrottalegum hætti í borginni. Morðin eru vel þekkt í Suður-Kóreu og fjallar ein besta bíómynd í sögu landsins, Memories of Murder, um atburðina.

Maðurinn sem lögregla hefur grunaðan um að minnsta kosti þrjú morðin er 56 ára, að sögn lögreglu. Hann afplánar nú þegar lífstíðardóm vegna morðs og nauðgunar á mágkonu sinni árið 1994. Maðurinn hefur ekki verið nafngreindur en talið er að lögregla hafi borið kennsl á hann með aðstoð DNA-tækninnar.

Það sem vekur einna mesta athygli er sú staðreynd að maðurinn verður aldrei dæmdur fyrir glæpina sem hann er grunaður um að hafa framið. Ástæðan er sú að í Suður-Kóreu fyrnast glæpir og eru morð engin undantekning. Samkvæmt lögum fyrndust brotin árið 2006

Morðin voru öll framin með svipuðum hætti en fórnarlömbin voru konur á aldrinum 13 til 71 árs. Morðinginn faldi sig ýmist í runnum eða við göngustíga og réðst að fórnarlömbum sínum í skjóli nætur þegar enginn sá til. Var konunum nauðgað áður en þær voru kyrktar.