Hartsfield-Jackson flugvöllurinn í Atlanta í Bandaríkjunum er fjölfarnasti flugvöllur heims. Þetta er í 21. skiptið í röð sem flugvöllurinn skipar efsta sætið á listanum, samkvæmt frétt CNN.
Alls fóru 108,4 milljónir farþega um flugvöllinn á síðasta ári sem er 3,3 prósenta aukning frá árinu 2017. Í öðru sæti er Beijing Capital International-flugvöllurinn en 101 milljón farþega fór um flugvöllinn árið 2018.
Flugumferð hefur aukist mikið á undanförnum árum og skiptir þá engu hvort átt er við farþegaflug eða fragtflug. Flugferðum með farþega fjölgaði um 6,4 prósent á heimsvísu í fyrra en flugferðum með farm fjölgaði um 3,4 prósent.
Þá er bent á að fyrir 10 árum voru aðeins 16 flugvellir í heiminum sem náðu því að taka á móti minnst 40 milljónum farþega, en á liðnu ári voru þeir 54 talsins.
Fjölförnustu flugvellir heims:
1. Hartsfield-Jackson Atlanta, Bandaríkin: 108,4 milljónir
2. Beijing Capital International, Kína: 101 milljón
3. Dubai International, Sameinuðu arabísku furstadæmin: 89,1 milljón
4. Los Angeles International, Bandaríkin: 87,5 milljónir
5. Haneda-flugvöllur í Tókýó, Japan: 86,9 milljónir
