Á Íslandi eru nú hátt í 300 sérfræðingar staddir sem taka þátt í Northern Challenge, sem er alþjóðleg sprengjuleitaræfing á vegum NATO. Markmið æfingunnar er að kanna viðbrögð við hryðjuverkum við hinar ýmsu aðstæður hvort sem það er á flugvelli, í höfnum, við bryggju eða í skipi.
Æfingin hófst á sunnudaginn og lýkur henni í næstu viku. Virkjuð er sérhæfð stjórnstöð þar sem öll uppsetning og vinnubrögð eru samkvæmt alþjóðlegum ferlum NATO.
Í samtali við Morgunblaðið segir Keith Mabbott, undirforingi í konunglega breska sjóhernum, Ísland henta vel til sprengjuleitaræfinga, að hér sé bæði veðurfarið og landslagið krefjandi. „Ef þú getur framkvæmt sprengjuleit á Íslandi getur þú gert það hvar sem er,“ segir Mabbott.
Notast er við starfssvæði Landhelgisgæslunnar á Keflavíkurflugvelli við æfingarnar en einnig eru æfingar á hafnarsvæðum víða á Suðurnesjum. Þetta mun vera í átjánda sinn sem þessi æfing er haldin.
