Það sem af er ári hafa 389 einstaklingar leitað til Bjarkarhlíðar, miðstöðvar fyrir þolendur ofbeldis. Þar af 71 karlmenn. Samkvæmt Rögnu Björg Guðbrandsdóttur, verkefnastýru Bjarkarhlíðar er um að ræða helmingsaukningu á fjölda þeirra karlmanna sem leiti til Bjarkarhlíðar. Þetta kom fram í kvöldfréttum stöðvar 2.

Árið 2018 leituðu 479 manns til Bjarkarhlíðar, þar af 61 karlmenn, eða um 9%. Árið 2017 voru karlmenn um 7% skjólstæðinga. Í ár eru þeir orðnir 13 prósent.

„Karlmenn eru að sækja sér aðstoð í auknum mæli. Það er alveg helmings aukning frá því í fyrra,“ sagði Ragna í samtali við fréttastofu Stöðvar 2.  „Umræðan um ofbeldi hefur aukist, sérstaklega þegar kemur að heimilisofbeldi. Flestir af þessum mönnum eru að leita sér aðstoðar sem þolendur heimilisofbeldis“ Karlmenn leita einnig til Bjarkarhlíðar vegna kynferðisofbeldis eða ofbeldis í æsku. Ragna segir mikla vöntun á athvarfi fyrir karlmenn á borð við Kvennaathvarfið.

„Því það eru að koma upp mál þar sem karlmenn hafa í ekkert skjól að vernda og eru jafnvel bara að sækja inn til  jafnvel aldraðra foreldra. Karlmenn séu gjarnan hikandi við að leita réttar síns eftir að brotið er gegn þeim af ótta við viðbrögð.  Því kæra þeir síður brotin.

„Þeir óttast viðbrögð lögreglu, þeir óttast um hvernig verður tekið á málunum og þeir óttast um það að vera sakaðir sjálfir um líkamlegt ofbeldi ef þeir hafa þurft að koma sér sjálfir úr aðstæðunum með því að halda konum til að stoppa ofbeldið“