Embætti ríkislögreglustjóra segist furða sig á yfirlýsingu Landssambands lögreglumanna sem send var fjölmiðlum í gærkvöldi. 

Stjórn Landssambandsins hafði ekkert samband við embættið til að ræða þær áhyggjur sem sambandið hefur af stöðu mála og hefur ekki lagt fram neinar kvartanir.

„Landssamband lögreglumanna á fulltrúa bæði í fata- og búnaðarnefnd og bílanefnd embættisins og hefur formaðurinn meðal annara sjálfur setið í þeim. Fulltrúi landssambandsins hefur unnið með embættinu að útboði á einkennisfatnaði fyrir lögreglumenn sem birtast mun innan skamms.“

Þegar liggi fyrir að bílamiðstöð ríkislögreglustjóra verði lögð niður. 

„Ríkislögreglustjóri hafði sjálfur frumkvæði að því að óska eftir því við ríkisendurskoðanda að fram færi úttekt á bílamiðstöð og áhrifum þeirra breytinga sem ný lög um opinber fjárlög hafa haft á reksturinn.“

 Að endingu tekur ríkislögreglustjóri fram að það sé tímabært að huga að framtíðarskipan lögreglu og því skynsamlegt að stjórnsýsluúttekt ríkisendurskoðanda beinist að lögreglumálum í heild, fremur en aðeins að ríkislögreglustjóra.