Arnar Þór Viðarsson, yfirmaður knattspyrnumála hjá KSÍ, vakti athygli í viðtali við Fótbolta.net á dögunum.
Þar ræddi Arnar leikmanninn unga Þórð Gunnar Hafþórsson sem er á mála hjá Vestra á Ísafirði.
Arnar sagði að Þórður ætti í hættu á að staðna hjá Vestra og að hann þyrfti að taka næsta skref á ferlinum þrátt fyrir ungan aldur.
Samúel Samúelsson, stjórnarformaður Vestra, sendi Arnari pillu í kjölfarið og gagnrýndi þessi ummæli harðlega.
Arnar var umræðuefni í hlaðvarpsþættinum Dr. Football sem flestir aðdáendur ættu að kannast við.
Einn af sérfræðingum þáttarins, Mikael Nikulásson, hafði athyglisverða hluti að segja um þessi ummæli Arnars.
,,Í fyrsta lagi á Arnar Viðarsson að vita hvað strákurinn í Vestra heitir, það er virðingarleysi að tala bara um strákinn í Vestra,“ sagði Mikael.
,,Hann er yfirmaður knattspyrnumála og þjálfari U21 landsliðsins, þetta er gæi sem er að velja í ekki nema 20 manna hóp hjá 19 ára landsliðinu, þetta er ekki einhver 70 manna hópur, ég byrja á því.“
,,Ekki tala tala um leikmanninn í Vestra sem hann veit greinilega ekki hvað heitir.“
,,Ef ég væri í stöðu Arnars Þórs Viðarssonar þá myndi ég vita hvað hann heitir, ég get alveg lofað ykkur því. Þetta er fáránlegt.“
,,Ég skil Samma kónginn á Ísafirði að vera pirraður yfir þessu og ég held að Arnar hafi komið með smá látum þarna inn en mér finnst svolítið eins og hann sé að tala eins og hann sé að finna upp fótboltann fyrir Íslendinga.“
