Hannes Þór Halldórsson, markvörður Vals, var súr í kvöld eftir 3-3 jafntefli við Breiðabliks í Pepsi Max-deild karla.

Hannes hefur átt betri leiki en Valsmenn komust í 2-0 yfir áður en Blikar svöruðu og var staðan 3-2 fyrir þeim grænu á 62. mínútu.

,,Þetta var skrítinn leikur maður. Ég er drullu svekktur með að missa niður 2-0 forystu í þriðja skiptið í sumar,“ sagði Hannes við Stöð 2 Sport.

,,Þetta var algjör klaufagangur. Stundum ertu með full tök á leiknum en þeir skora svo þrjú mörk og við gerum vel í að koma til baka og settum pressu í lokin en eitt stig er ásættanlegt.“

,,Það er erfitt að segja hvað gerist, þetta er skrítin íþrótt stundum.“

,,Ég þarf að skoða þessi mörk betur, þriðja markið var eitt það skrítnasta sem ég hef fengið á mig.“

,,Við hittum ekki boltann eftir fyrstu hreinsun og svo held ég að einhver Bliki skjóti og hann rúllar í gegnum 2-3 menn og ég er úr jafnvægi þegar ég sé hann.“