Óvenjuleg líkamsárás átti sér stað í iðnaðarhverfi í Hafnarfirði í dag, mitt á milli Reykjanesbrautar og Reykjavíkurvegar, en þá réðst maður á annan mann með sverði. Ökumaður á vettvangi lýsti atvikinu fyrir blaðamanni. Það hægðist mjög á umferð þó að mennirnir væru ekki í akveginum heldur við götuna, líklega vegna forvitni ökumanna. Þegar bílalestin mjakaðist lítið eitt áfram sá heimildarmaður okkar mann með sverð í hendi standa yfir öðrum manni. Í þann mund sem heimildarmaðurinn ætlaði að hringja á lögreglu kom ómerktur lögreglubíll á vettvang og lögreglumenn höfðu hendur í hári mannanna.
Hann segir jafnframt að mennirnir hafi báðir virst í annarlegu ástandi – líklega undir áhrifum fíkniefna.
Ekki virtust alvarlegir áverkar á þeim sem hélt ekki á sverðinu en hann var settur í járn og færður inn í bíl. Síðast þegar heimildarmaður okkar sá til voru lögreglumenn að tala til manninn með sverðið. Sá sem var færður inn í bílinn var með áverka í andliti. Samtals voru fjórir lögreglubílar í hið minnsta og eitt lögregluvélhjól á vettvangi áður en heimildarmaður okkar fór burtu.
Lögreglan á höfuðborgarsvæðinu gat ekki veitt upplýsingar um málið að svo stöddu en vakthafandi varðstjóri og lögreglufulltrúi voru farnir heim af vakt er atvikið átti sér stað.
Fréttin verður uppfærð ef tilefni gefast til þess