Hjörvar Hafliðason, sjálfur Dr. Football telur að Hannes Þór Halldórsson markvörður Vals, sé andlega þreyttur. Þetta kemur fram í nýjasta hlaðvarpsþætti Hjörvars.

Hann hefur staðið sig með ágætum í marki Vals í sumar, eftir að hann gekk í raðir félagsins. Mikið hefur verið fjallað um Hannes eftir heimkomu hans, stærsta nafnið í Pepsi Max-deildinni.

,,Þetta er búið að fara óheppilega af stað hjá Hannesi þarna hjá Val, hann var fenginn til að koma liðinu lengra í Evrópukeppni, því það var markvarðarstaðan sem kostaði þá þetta ævintýri gegn Rosenborg í fyrra;“ sagði Hjörvar en Valur féll úr leik í Evrópu í gær.

,,Það sem ég held með Hannes, er að hann sé þreyttur. Þá hugsa einhverjir að hann sé markvörður og að hann sé ekki þreyttur. Hann er búinn að spila samfleytt frá 2017, hann tekur danska tímabilið, fer beint á HM og beint til Aserbaídsjan og öllu því veseni sem því fylgdi. Beint þaðan til Íslands, frægasti og stærsti prófíll sem komið hefur í deildina í mörg ár, það mætti honum hellings neikvæðni.“

Hannes er fyrsti kostur í mark Íslands og verður að spila fram í nóvember með liðinu.

,,Ég held að eftir landsleikina í haust, þá þarf að gefa honum frí í mánuð. Þar sem hann finnur ekki lykt af hönskunum, að hann sé andlega þreyttur.“

,,Hann sefur bara í desember, hann verður að æfa fyrir landsleikina. Ég ætla svo að hvíla hann í desember og janúar, hann fer bara til Tenerife, á barinn hans Mæk,“ sagði Hjörvar Hafliðason en sérfræðingur þáttarins, Mikael Nikulásson opnar bar á Tenerife á morgun.