Flugvélin átti að fara af stað á þriðjudaginn klukkan hálffjögur svo fólkið hefur verið fast í Jersey í tæplega þrjá daga.
Dawn Parkin, einn af farþegunum ræddi við The Independent vegna málsins.
„Fluginu var seinkað eftir að við biðum í sex klukkutíma á meðan vélamaður reyndi að laga vélina. Þá vorum við send á hótel og látin koma aftur í gær bara til þess að ganga aftur í gegnum nákvæmlega það sama og gerðist daginn áður. Við biðum í marga klukkutíma á flugvellinum og fengum engar upplýsingar um málið.“
Flugfélagið sagði við farþegana í gær að það væri bið eftir varahlutum í flugvélina og þess vegna gæti vélin ekki farið af stað.
Farþegunum var sagt að mæta í dag til að fljúga með annarri flugvél.
„Okkur var sagt að mæta í dag til að fljúga með annarri vél en þegar við mættum sáum við að þetta væri sama vél. Við settumst upp í vélina og aftur kom upp þessi sama bilun, þrátt fyrir að vélamaðurinn hafi sagt að þetta væri komið í lag.“
Enginn frá easyJet hefur haft samband við farþegana eftir þetta til að bjarga málunum og koma þeim heim.
„Þau sögðu okkur bara að það væri verið að reyna að laga vélina aftur.“
Á hádegi í dag kom síðan tilkynning á netinu til farþeganna frá easyJet.
„Við biðjumst afsökunar á frekari töfum sem þið þurfið að ganga í gegnum í dag. Við erum að fá aðra vél hingað til að sjá um flugið ykkar.“
Samkvæmt evrópskum reglum um flugfarþega eiga allir farþegarnir rétt á að minnsta kosti 34 þúsund krónum í skaðabætur.
Þar sem flugið hefur haft þrjú mismunandi númer er hægt að færa rök fyrir því að farþegarnir eigi rétt á þrefaldum skaðabótum.
