Kviknakinn maður gekk eftir Vonarstræti síðdegis í dag og fór inn í Ráðhús Reykjavíkur við Tjarnargötu. Bílstjóri sem var á ferð í götunni sendi DV mynd af atvikinu. Maðurinn er nánast óþekkjanlegur á mynd bílstjórans en til að tryggja að enginn beri kennsl á hann höfum við átt við myndina fyrir birtingu.

Að sögn bílstjórans komu þrír lögreglubílar á fleygiferð og með blikkandi ljós eftir Lækjargötu í kjölfar atviksins. Bílstjóranum þykir líklegt að það tengist nakta manninum þó ekki sé það staðfest. Nakti maðurinn var einn á ferð.

Mikil hlýindi eru í höfuðborginni þessa dagana og hafa margir fækkað fötum. Þarna er þó líklega gengið of langt enda telja sumir að full nekt á almannafæri geti sært blygðunarkennd annarra. Ekkert ákvæði í hegningarlögum leggur þó blátt bann við nekt á almannafæri. Í 209. grein almennra hegningarlaga er hins vegar að finna bann við því að særa blygðunarkennd manna með lostugu athæfi en sennilega þyrfti meira til en bara nekt á almannafæri til þess að brotið yrði fellt undir þetta ákvæði. Hins vegar er í lögreglusamþykktum margra sveitarfélaga að finna ákvæði um bann við ósæmilegri háttsemi eða hegðun og getur nekt á almannafæri fallið undir það. Það er þó engan veginn óvéfengjanlegt að nekt á almannafæri sé bönnuð samkvæmt lögreglusamþykkt.