Á heimasíðu Landlæknisembættisins er greint frá því að níu af þeim tíu börnum sem greinst hafa með sýkingu af völdum E.Coli-bakteríu hafi smitast í Efstadal 2, en það er ferðaþjónustubær í Bláskógabyggð.

Fjögur af þessum tíu börnum hafa greinst með al­var­lega sýkingu, en þau greindust öll fyrir helgi, þau eru nú öll á batavegi. Hin börnin eru ekki talin vera með alvarlega sýkingu, þau eru þó undir stöðugu eftirliti hjá Barnaspítala Hringsins. Matvælastofnun greinir frá því að börnin sem greindust með sýkinguna um og eftir helgi séu á aldursbilinu eins til tólf ára.

Ekki er vitað hvernig smitið hefur borist til barnana, en það hefur líka fundist í hægðasýni frá kálfum á þessum sama stað.

Bæði Landlæknisembættið og Matvælaastofnun taka fram að ekki sé talið að smit hafi átt sér stað með vatni í Bláskógabyggð og ekkert bendir til að smitið eigi uppruna sinn annars staðar í sveitinni.

Landlæknir hvetur þá ein­staklinga sem heim­sóttu Efstadal 2 á síðast­liðnum tveimur vikum og fengu niður­gang innan 10 daga frá heim­sókninni til að leita til læknis. Þó er tekið fram að ein­kenna­lausir ein­staklingar sem hafa heim­sótt Efsta­dal 2 þurfi ekki að leita læknis né heldur ein­staklingar sem fengið hafa niður­gang.