Athafnamaðurinn Sigmar Vilhjálmsson hefur verið ráðinn talsmaður nýs félags í eigu svínabænda, eggjabænda og kjúklingabænda. Frá þessu er greint í Bændablaðinu.
Félagið heitir FESK og er markmið félagsins að stuðla að upplýstri og ábyrgri umræðu um landbúnað á Íslandi. Félagið verður málsvari Félags kjúklingabænda, Félags eggjabænda og Félags svínabænda á opinberum vettvangi og einnig koma fram fyrir hönd félagsmanna.
„Í nútíma samfélagi er offramboð af upplýsingum og því miður eru upplýsingarnar oft harðsoðnar, stuttar og klipptar úr samhengi. Mitt hlutverk verður að létta á bændum með því að fylgjast með umræðunni og svara fyrir þá þætti sem FESK telur ekki nægilega skýra,“ segir Sigmar. Mikið sé sótt að íslenskum landbúnaði þessa dagana og margt þurfi að vera skýrara í umræðunni.
„Það er samfélagslega mikilvægt að ræða þessi mál án sleggjudóma. Landbúnaður snýst um samfélagið okkar, þjóðina, heilsu og náttúruvernd. Allt eru þetta málefni sem eru gríðarlega mikilvæg, ekki bara hér á landi, heldur allsstaðar í heiminum. Matvælaframleiðsla, lýðheilsa og sjálfbærni, eru stór þáttur í verkefnum allra stjórnvalda í heiminum. Ísland hefur ennþá sterka stöðu í þessum efnum og hana ber að verja. FESK mun leggja sitt af mörkum til að svo megi verða áfram.“
