Í gærkvöld reyndi karlmaður að tæla unga stúlku upp í bíl sinn en atvikið átti sér stað í Reykjanesbæ. Maðurinn sagði stúlkunni að móðir hennar væri slösuð eftir umferðarslsys og hún þyrfti því að koma með honum og koma upp í bílinn.

Að sögn lögreglunnar á Suðurnesjum brást stúlkan hárrétt við með því að hlaupa í burtu og rakleiðis heim þar sem hún lét vita um atvikið.

Leit lögreglu að manninum og bílnum hefur ekki borið árangur, en skráningarnúmerið náðist ekki. Lögreglan á Suðurnesjum biður foreldra að brýna fyrir börnum sínum að fara ekki upp í bíla með ókunnugum og tilkynna strax um atvik sem þetta.