„Stórundanlegt aksturslag bifreiðar vakti athygli lögreglumanna á Suðurnesjum þegar þeir voru við hefðbundið eftirlit í fyrrakvöld. Bifreiðinni var ekið kantanna á milli, rásandi út um allan veg, í átt að flugstöðinni. Ökumaðurinn sveiflaði höndunum ákaft og var með aðra út um gluggann bílstjóramegin,“ segir í tilkynningu frá lögreglunni á Suðurnesjum.
Maðurinn gaf lögreglunni þær skýringar á aksturslagi sínu að hann hafi verið að dansa við tónlist sem hann hlustaði á á meðan hann keyrði. Brást hann illa við athugasemdum lögreglunanr og var erfitt að ræða við hann. Hann róaðist þó þegar honum var komið í skilning um að hann ætti að hafa hendur á stýri í akstri því annað gæti skapað mikla hættu í umferðinni. Ók hann svo prúður á brott með báðar hendur á stýri.
Miðað við þetta virðist maðurinn hafa verið alsgáður þar sem lögreglan handtók hann ekki og leyfði honum að halda áfram akstri en um það segir ekkert í tilkynningunni.
Þá segir einnig í sömu tilkynningu frá lögreglunni á Suðurnesjum að bíll valt á Djúpavatnsleið á Suðurnesjum í fyrradag. Þrennt var í bílnum og sluppu þau ómeidd. Ökumaðurinn hafði verið að aka upp brekku og hemlað með þeim afleiðingum að bíllinn rann út af og valt. Ekkert tjón varð á bílnum en hann sat kyrfilega fastur í aur utan vegar og þurfti dráttarbíl til að ná honum upp.
