Umhverfisstofnun hefur tilkynnt náttúruspjöllin sem unnin voru á Helgafelli á dögunum til lögreglu. Þetta kemur fram í frétt á vef Umhverfisstofnunar.

Eins og DV greindi frá í gær var Maríu Elíasdóttur brugðið þegar hún fór á Helgafell á dögunum. Búið var að rita nöfn og önnur tákn, til dæmis reðurtákn, í mjúka móbergsklöppina.

„Það er eins og að hér hafi verið hópur að verki, þar sem þetta er heilmikil vinna,“ sagði María í samtali við DV.

„Svona áletrarnir eru skýrt brot á náttúruverndarlögum og gríðarleg vanvirðing gagnvart náttúru landsins, enda skilja brotin eftir sig skemmdir sem getur tekið veður og vinda tugi eða hundruð ára að afmá. Það sem verra er, svona athæfi geta virkað sem hvatning fyrir aðra til að gera slíkt hið sama. Umhverfisstofnun hefur tekið náttúruspjöllin við Helgafell til meðferðar og hefur tilkynnt brotin til lögreglu. Þá lýsir Umhverfisstofnun áhyggjum af utanvegaakstri og óvirðingu við náttúru landsins sem fjallað hefur verið um síðustu vikur,“ segir í frétt Umhverfisstofnunar.

Þá segir að náttúruspjöll séu lögbrot sem sæta viðurlögum. Hvetur stofnunin ferðalanga til að halda vöku sinni og tilkynna brot.

„Hjálpumst að við að halda náttúru okkar óspilltri. Ef það er ekki gestabók á fjallstindinum sem þú toppaðir, vinsamlegast slepptu því að rita nafnið þitt.“