Sigurður A. Magnússon, rithöfundur, blaðamaður og þýðandi, lést 2. apríl, 89 ára að aldri. Sigurður skrifaði fjölda bóka, skáldsögur, ljóð, leikrit, ferðasögur, endurminningabækur, greinasöfn og fræðibækur.
Fyrsta bók Sigurðar var ferðasagan Grískir reisudagar sem hann sendi frá sér 25 ára gamall árið 1953, en hann er þó líklega þekktastur fyrir endurminningabækur sínar. Sú fyrsta var Undir kalstjörnu, en þar segir hann frá átakanlegum uppvexti sínum í Reykjavík á kreppuárunum upp úr 1930. Sigurður hlaut Menningarverðlaun DV árið 1980 fyrir bókina.
Sigurður var enn fremur einn afkastamesti þýðandi þjóðarinnar. Hann þýddi bækur og ljóð eftir fjölda höfunda úr dönsku, ensku, þýsku og grísku, meðal annars eftir H.C. Andersen, Bertolt Brecht, Gíorgos Seferis, Pandelis Prevalakis, Walt Whitman, James Joyce, Nagíb Mahfúz, Kazuo Ishiguro, John Fowles og Ernest Hemingway.
