Lögreglan á Suðurnesjum handtók karlmann í gær sem staðinn var að akstri undir áhrifum fíkniefna. Maðurinn var með tvo unga syni sína í bifreiðinni og var annar þeirra án öryggis- og verndarbúnaðar.

„Sýnatökur á lögreglustöð sýndu jákvæðar niðurstöður á neyslu ökumannsins á fíkniefnum og var viðkomandi því handtekinn. Aðstandendum barnanna svo og barnavernd Reykjavíkur var gert viðvart um málið,“ segir í skeyti frá lögreglunni.

Þá kemur fram lögregla hafi þessu til viðbótar tekið fáeina ökumenn úr umferð vegna gruns um fíkniefnaneyslu á undanförnum dögum.  Þá hafa nær tuttugu ökumenn verið kærðir fyrir of hraðan akstur.  Skráningarnúmer voru fjarlægð af sex bifreiðum sem voru óskoðaðar eða ótryggðar.