Fyrir þá sem eru í fasteignahugleiðingum, en leiðist að búa í fjölbýli, er sennilega best að skoða einbýlishús en fjárhagurinn leyfir það þó líklega í fæstum tilvikum. Ekki örvænta þó, því ef þú ert tilbúin að yfirgefa nútímaþægindi höfuðborgarsvæðisins þá er neðangreint hús falt fyrir aðeins 10,9 milljónir króna.
„Fólk talar eins og fasteignaverð sé eitthvað galið á Íslandi, á meðan er hægt að kaupa þetta einbýlishús/glæpavettvang(?) á léttar 11 milljónir,“ tísti spaugfuglinn og pistlahöfundurinn Hrafn Jónsson þar sem hann deildi myndum af einbýlishúsi sem er til sölu í Þykkvabæ á Hellu.
Fólk talar eins og fasteignaverð sé eitthvað galið á Íslandi, á meðan er hægt að kaupa þetta einbýlishús/glæpavettvang(?) á léttar 11 milljónir! pic.twitter.com/41vKwMVY81
— Hrafn Jónsson (@hrafnjonsson) May 16, 2019
Eignin er í sölu hjá Fasteignasölunni Fasteignaland og er eigninni lýst með eftirfarandi hætti í auglýsingu þeirra:
Fasteignaland kynnir: tvílyft einbýlishús við Hábæ í Þykkvabæ. Um er ræða 97,8 fm hús á á 832 fm eignarlóð. Húsið er byggt árið 1943. Jarðhæð hússins er skráð 69,9 fm, ris 27,9 fm. Húsið hefur verið endurnýjað að hluta þ.e.a.s tvær hliðar hússins klæddar og ný einangrun sett í veggi. Gluggar og gler að hluta. Að innan hefur húsið verið endurbætt, rafmagn og innréttingar en frágangi er ólokið. Hiti er í gólfum á jarhæð hússins. Skriðkjallari er í húsinu.
[…] Ástand eignarinnar er þokkalegt og hefur eignin verið talsvert endurnýjuð en þarfnast lokafrágangs.
Þegar myndi af eigninni eru skoðaðar virðist það vissulega rétt að eignin hafi verið endurnýjuð að hluta. Eldhúsinnrétting og tæki virðast fremur nýleg þó svo að blaðamaður þekki ekki alveg stílinn sem hönnuðurinn hefur farið eftir. Líklega voru fyrri eigendur ákaflega hávaxnir sem útskýrir borðplötuna sem er ofan á ofninum en blaðamaður er nokkuð viss um að stiginn upp á risið hljóti að brjóta einhverjar byggingareglugerðir. Viljum við einu sinni vita hvað skriðkjallari er ?
Sjón er sögu ríkari