Nýleg könnun Seðlabanka Íslands á væntingum markaðsaðila bendir til þess að væntingar um verðbólgu hafi minnkað frá síðustu könnun bankans í lok janúar síðastliðnum. Nú vænta markaðsaðilar þess að verðbólga verði 3,3 prósent á öðrum og þriðja ársfjórðungi í ár en hjaðni í 3 prósent á fjórða ársfjórðungi.
Þetta kemur fram í tilkynningu frá Seðlabankans en bankinn kannaði væntingar markaðsaðila dagana 6. til 8. maí síðastliðinn. Leitað var til 28 markaðsaðila á skuldabréfamarkaði, það er banka, lífeyrissjóða, verðbréfa- og fjárfestingarsjóða, verðbréfamiðlana og fyrirtækja með starfsleyfi til eignastýringar. Svör fengust frá 23 aðilum og var svarhlutfallið því 82 prósent.
Í niðurstöðunum kemur fram að markaðsaðilar vænti þess að verðbólga verði 3 prósent eftir eitt ár og 2,8 prósent eftir tvö ár. Í könnuninni var enginn sem taldi taumhald peningastefnunnar vera of laust um þessar mundir en í fyrri könnun bankans taldi tæpur fjórðungur svo vera.
