Katrín Jakobsdóttir, forsætisráðherra, segir að sáttanefnd vegna eftirmála Guðmundar- og Geirfinnsmála sé enn að störfum og segist hún binda vonir til að hægt verði að ná samkomulagi við þá fimm sem voru sýknaðir í Hæstarétti sem og afkomendur þeirra.

Fréttablaðið skýrir frá þessu og segir að þetta hafi komið fram í svari Katrínar við fyrirspurn Helgu Völu Helgadóttur, þingmanns Samfylkingarinnar.

Kristrún Heimisdóttir veitir nefndinni forystu en Katrín skipaði nefndina í kjölfar sýknudóms Hæstaréttar í september síðastliðinn.

Fram hefur komið að aðstandendur Tryggva Rúnars Leifssonar séu ósáttir við störf nefndarinnar og Erla Bolladóttir, sem fékk mál sitt ekki endurupptekið, hefur einnig gagnrýnt seinagang nefndarinnar.

Fram hefur komið að sáttanefndin hafi um 600 milljónir til ráðstöfunar en hvort sú upphæð dugi til að ná sáttum er annað mál. Ragnar Aðalsteinsson, lögmaður Guðjóns Skarphéðinssonar, skýrði frá því í Silfrinu á RÚV á sunnudaginn að hann krefjist rúmlega 1.000 milljóna í bætur fyrir hönd Guðjóns.